Sot, në Komunën e Obiliqit, u mbajt ceremonia e përurimit të punimeve në dy ndërtesat shumëbanesore sociale, të realizuara në kuadër të projektit “Zbatimi i masave të efiçiencës së energjisë për ndërtesat shumëbanesore sociale”.
Në këtë ceremoni morën pjesë Nënkryetari i Komunës së Obiliqit, z. Berat Gashi, znj. Artane Rizvanolli, Ministre e Ekonomisë, z. Elbert Krasniqi, Ministër i Administrimit të Pushtetit Lokal, z. Nenad Rashiq, Ministër për Komunitete dhe Kthim, znj. Eva Pálatová, Shefe në detyrë e BE-së në Kosovë, si dhe znj. Njomza Hoxha, Drejtoreshë Menaxhuese e Fondit të Kosovës për Efiçiencë të Energjisë (FKEE).
Gjatë kësaj ceremonie u prezantuan edhe masat e zbatuara në kuadër të këtij projekti, të cilat përfshijnë:
- Renovimin e mbështjellësit të ndërtesës, përfshirë izolimin e mureve, ndërrimin e dritareve dhe elementeve të tjera që ndikojnë në ruajtjen e energjisë;
- Përmirësimin e ndriçimit të brendshëm, përmes zëvendësimit të të gjitha pikave të ndriçimit me llamba LED me efikasitet të lartë energjetik;
- Përmirësimin e sistemit të ngrohjes qendrore.
Realizimi i këtij projekti paraqet një hap të rëndësishëm drejt përmirësimit të kushteve të jetesës për banorët e këtyre ndërtesave, duke kontribuar njëkohësisht në rritjen e efiçiencës së energjisë dhe në avancimin e mirëqenies së qytetarëve.
