Kryetari i Komunës së Obiliqit, z. Halil Thaçi, priti në takim ambasadoren Nancy Soderberg, njëherësh drejtoreshë e Institutit Demokratik Kombëtar (NDI) në Kosovë.
Gjatë takimit u diskutua për nevojat dhe prioritetet e Komunës së Obiliqit, me theks të veçantë në sektorët e arsimit dhe shëndetësisë, si dhe për rëndësinë e fuqizimit të rolit të grave dhe vajzave në vendimmarrje dhe jetën publike. Po ashtu, u theksua nevoja për rritjen e përfshirjes së komuniteteve dhe grupeve të ndryshme shoqërore në proceset zhvillimore lokale.
Kryetari Thaçi shprehu mirënjohjen për mbështetjen e vazhdueshme të NDI-së dhe theksoi gatishmërinë e Komunës së Obiliqit për bashkëpunim të mëtejmë në projekte që synojnë forcimin e demokracisë lokale, transparencës dhe pjesëmarrjes qytetare.
Nga ana e saj, ambasadorja Soderberg vlerësoi angazhimin e Komunës së Obiliqit dhe ritheksoi përkushtimin e NDI-së për të mbështetur iniciativa që promovojnë barazinë, përfshirjen dhe zhvillimin e qëndrueshëm në nivel lokal.
