Kryetari i Komunës së Obiliqit, z. Xhafer Gashi, në sallën e Kuvendit Komunal ka mirëpritur nxënësit e klasëve të gjashta nga Shkolla Fillore “Hasan Prishtina” në Milloshevë, të shoqëruar nga drejtori i shkollës, z. Naser Abazi, dhe arsimtarja e gjuhës shqipe, znj. Shahbaze Vishaj-Grajqevci.
Gjatë takimit biseduan për tema që lidhen me nxënësit dhe shkollën, ndërsa kryetari Gashi i ka njoftuar nxënësit për mënyrën e funksionimit të Kuvendit Komunal dhe të ekzekutivit të Komunës.
Kryetari Gashi ka theksuar se takimet me nxënës janë gjithmonë të mirëseardhura, sepse puna institucionale ka për qëllim ndërtimin e një të tashmeje dhe të ardhmeje më të mirë për ta, gjithmonë ka hapësirë për ide të reja, veçanërisht nga fëmijët që përfaqësojnë të ardhmen.
Në fund, kryetari Gashi ka falënderuar drejtorin, arsimtaren dhe nxënësit për vizitën, duke u uruar shumë suksese në rrugën e dijes!
