Kryetari i Komunës së Obiliqit, z. Halil Thaçi, së bashku me Drejtoreshën e Arsimit, znj. Sevdije Berisha Krasniqi, dhe Shefin e Kabinetit, z. Bashkim Gashi, kanë zhvilluar një takim me përfaqësuesit e Sindikatës së Bashkuar të Arsimit, Shkencës dhe Kulturës (SBASHK).
Në takim morën pjesë Kryetari i SBASHK-ut, z. Rrahman Jashari, Sekretari, z. Ymer Ymeri, Kryetari i Sindikatave, z. Atdhe Hykolli, si dhe Kryetarja e SBASHK-ut në Obiliq, znj. Luljeta Boshnjaku.
Gjatë takimit u diskutuan një sërë çështjesh të rëndësishme që lidhen me arsimin në Komunën e Obiliqit, me theks të veçantë në normat mësimore, orarin e punës, ngritjen e cilësisë në arsim, si dhe mundësitë për avancimin e bashkëpunimit ndërmjet institucioneve komunale dhe përfaqësuesve sindikalë.
Po ashtu, vëmendje e veçantë iu kushtua zbatimit të Kontratës Kolektive dhe adresimit të çështjeve që ndikojnë drejtpërdrejt në punën dhe mirëqenien e mësimdhënësve, me synim krijimin e një mjedisi sa më të favorshëm për procesin edukativo-arsimor.
Përfaqësuesit e Komunës dhe të SBASHK-ut shprehën gatishmërinë për të vazhduar komunikimin dhe bashkëpunimin në mënyrë të vazhdueshme, në funksion të adresimit të çështjeve të përbashkëta dhe përmirësimit të kushteve në institucionet arsimore.
Komuna e Obiliqit mbetet e përkushtuar për bashkëpunim të ngushtë me institucionet arsimore dhe përfaqësuesit sindikalë, duke synuar avancimin e vazhdueshëm të arsimit dhe krijimin e kushteve sa më të mira për mësimdhënësit dhe nxënësit.
