Kryetari i Komunës së Obiliqit, z. Xhafer Gashi, së bashku me Drejtoreshën e Drejtorisë për Shëndetësi dhe Mirëqenie Sociale, znj. Brikenda Pllana Mehani, Drejtorin e QKMF-së, z. Haki Jashari, dhe stafin e QKMF-së, përuruan mamografin digjital në Qendrën Kryesore të Mjekësisë Familjare në Obiliq, një pajisje moderne dhe e domosdoshme për diagnostikimin e hershëm të sëmundjeve të gjirit.
Mamografi digjital është donacion i kompanisë “Medika”, me përfaqësues Arbër Merovci dhe Arian Ukelli.
Pajisja e re do të jetë në funksion të plotë për gratë e komunës sonë, duke rritur qasjen në shërbime shëndetësore cilësore dhe duke ndihmuar në parandalimin dhe trajtimin e hershëm të kancerit të gjirit.
Me këtë rast, kryetari Gashi ka falënderuar të gjithë personelin shëndetësor të QKMF-së për përkushtimin dhe profesionalizmin e treguar çdo ditë në shërbim të qytetarëve.
Po ashtu, në mënyrë të veçantë ka falënderuar donatorët të cilët mundësuan këtë pajisje moderne për banorët e Obiliqit.
Pajisja e re është një mbështetje shtesë për punën e tyre të palodhshme dhe për përmirësimin e shërbimeve që ofrohen në këtë institucion.
Kryetari Gashi ka theksuar se “Shëndetësia mbetet një nga prioritetet kryesore të qeverisjes sonë dhe investimet tona në këtë drejtim do të vazhdojnë me përkushtim të plotë.”
