Sonte, në sheshin “Dëshmorët e Kombit” në Obiliq, nën tingujt e valleve të bukura shqipe nga AKV “Qyteti i Obiliqit” dhe këngëve të interpretuara nga artistët DJ Kronz, mërgimtarja Hajrie Preniqi Gashi, Vesad Mjeku dhe këngëtarja e mirënjohur Shkurte Gashi, u mbajt koncerti festiv “Me zemër për ju”, nën përkujdesjen e Drejtorisë për Kulturë, Rini dhe Sport.
Kryetari i Komunës së Obiliqit, z. Xhafer Gashi, në fjalën e tij falënderoi nga zemra të gjithë bashkatdhetarët për kontributin e tyre të çmuar për shtetin e Kosovës dhe qytetin e Obiliqit, duke ju uruar një qëndrim të këndshëm pranë familjeve në vendlindje.
Në shenjë falënderimi dhe mirënjohjeje për humanizmin dhe bamirësinë, kryetari Gashi pati kënaqësinë të ndajë disa mirënjohje për bashkatdhetarët tanë.
Mirënjohje u ndanë gjithashtu për të gjitha klubet sportive, rinore dhe kulturore që veprojnë në Komunën e Obiliqit, për arritjet dhe përkushtimin e tyre të vazhdueshëm, të cilët po na përfaqësojnë me dinjitet edhe në arenën ndërkombëtare.
Kryetari Gashi falënderoi të gjithë bashkëqytetarët dhe bashkatdhetarët për pjesëmarrjen, si dhe artistët që krijuan një atmosferë të mrekullueshme.
Po ashtu, kryetari Gashi vizitoi edhe Panairin e Grave, i cili u mbajt në të njëjtin shesh dhe solli ushqime tradicionale e punime artizanale nga gratë e Shoqatës “Dëgjo Zërin Tim”.
Faleminderit të gjithëve për këtë mbrëmje të paharrueshme!
Ju presim edhe nesër, nga ora 20:00, me këngëtarë të mirënjohur nga estrada jonë!
