Kryetari i Komunës së Obiliqit, Xhafer Gashi, së bashku me Nënkryetarin, Komandantin e SP-së, përfaqësues të shoqatave të dala nga lufta, familjarë të dëshmorëve e martirëve, asambleistë, ekzekutivin dhe qytetarë, bënë homazhe pranë Pllakës Përkujtimore, duke nderuar të rënët për liri dhe shtetndërtim.
Për të vazhduar me Akademi Përkujtimore në Shtëpinë e Kulturës “Xhavit Haziri”, ku, nën përkujdesjen e Drejtorisë për Kulturë, Rini dhe Sport, u dha një program kulturor e artistik në shënim të kësaj dite.
Kryetari Gashi, në fjalën e tij, theksoi se: “Duke nderuar dëshmorët që ranë për lirinë e atdheut, ne nderojmë vetveten, identitetin dhe historinë tonë të lavdishme. Ne përulemi me mirënjohje para sakrificës së tyre, duke kujtuar përpjekjet shekullore të popullit tonë për liri, drejtësi dhe pavarësi. Gjaku i tyre i derdhur është themeli mbi të cilin qëndron e ardhmja jonë – një e ardhme që ne e gëzojmë falë guximit dhe vendosmërisë së tyre.”
Akademia u përcoll me recitim skenik nga Teatri i Qytetit dhe me këngë nga Vesad Mjeku.
Lavdi e përjetshme dëshmorëve të kombit!
Nderim i përjetshëm për luftëtarët e lirisë!
