Kuvendi Komunal i Obiliqit ka mbajtur sot seancën inauguruese për fillimin e mandatit të katërvjeçar.
Në këtë ceremoni morën pjesë mysafirë të shumtë, përfaqësues të institucioneve lokale dhe qendrore, përfaqësues të Shoqatave të dala nga Lufta e Ushtrisë Çlirimtare të Kosovës, organizata të shoqërisë civile, media dhe shumë të ftuar të tjerë.
Seanca u udhëhoq nga anëtari më i vjetër i Kuvendit, Enver Gashi, i cili në fjalën e tij përshëndetëse uroi anëtarët e rinj të Kuvendit dhe theksoi rëndësinë që ka për secilin prej tyre përgjegjësia në organin më të lartë të pushtetit lokal.
Pas fjalës hyrëse, seanca vijoi me dhënien e betimit dhe nënshkrimin e deklaratave nga 21 anëtarët e zgjedhur të Kuvendit Komunal.
Po ashtu, betimin para Kuvendit e dha edhe Kryetari i Komunës së Obiliqit, z. Halil Thaçi.
Në fjalimin e tij, Kryetari Thaçi shprehu mirënjohje për qytetarët e Obiliqit për besimin e dhënë dhe ritheksoi zotimin për përkushtim të pandalshëm në avancimin e jetës, zhvillimit dhe mirëqenies së qytetarëve të komunës.
Fjalimi i plotë i Kryetarit Halil Thaçi:“Të nderuar qytetarë të Obiliqit,Të dashura familje të dëshmorëve,Përfaqësues të organizatave të veteranëve dhe invalidëve të UÇK-së,Të nderuar familjarë, bashkëpunëtorë e miq,Të nderuar ish-kryetarë dhe ish-nënkryetarë të Komunës së Obiliqit,Para se të nis fjalimin tim, dua me respektin më të madh të kujtoj të rënët për lirinë e atdheut tonë. Ashtu si në të gjitha trevat shqiptare, edhe në Komunën e Obiliqit ka shumë familje që bijtë e bijat e tyre ranë dëshmorë për idealin më të shtrenjtë Lirinë.Kujtoj me nderim familjet Rama, Curri, Mexhani, Gashi, Morina, Kastrati, Grajqevci, Kelmendi, Krasniqi dhe shumë familje të tjera.Të dashur, lufta e Ushtrisë Çlirimtare të Kosovës është dhe do të mbetet vlera më e madhe e kombit tonë. Djem e vajza të rreshtuar nën emblemën e UÇK-së e bënë realitet ëndrrën e kombit për liri dhe pavarësi.Sot nuk është thjesht dita e betimit tim si kryetar. Sot është dita e betimit ndaj besimit tuaj. Besimi është kapitali më i çmuar që mund të ketë një institucion, dhe sot ju ma keni dhënë mua.Për këtë, faleminderit nga zemra.Dua të falënderoj të gjithë ata që qëndruan me ne në rrugën e gjatë deri këtu: bashkëpunëtorët e mi, aktivistët, njerëzit e vullnetit të mirë që besuan se Obiliqi mund të bëhet shembull i drejtësisë, i llogaridhënies dhe i punës së ndershme. Ky rezultat është i popullit, jo i individit.Faleminderit edhe të gjithë ish-kryetarëve të Komunës së Obiliqit për kontributin e tyre ndër vite. Secili ka pasur sfida dhe suksese. Sot unë nuk nisem me mohim, por me respekt për atë që është ndërtuar.Të nderuar të pranishëm,Në një shtet të ri si Kosova, ku sakrifica e popullit për çlirimin e atdheut është e madhe dhe kujtimet janë të freskëta, ku shumë plagë ende janë të hapura, politika nuk duhet të jetë privilegj. Politika është përgjegjësi.Nuk është pozitë që mbyllet pas nesh, por dritare që duhet të hapet për të gjithë.Kjo është qeverisja që kemi synuar: e drejtë, e pastër, transparente dhe me llogaridhënie.Ne do të punojmë për Obiliqin e të gjithëve për një komunë që nuk i ndahet qytetarëve, por u shërben atyre, pa dallime e pa privilegje të të paktëve, por me të drejta të barabarta për të gjithë.E di se detyra e kryetarit nuk është të flasë vetëm sot, por të dëgjojë çdo ditë.Do t’i dëgjoj qytetarët, fermerët, bizneset e vogla, të rinjtë, arsimtarët dhe punëtorët.Zëri juaj do të jetë udhërrëfyesi ynë.Para nesh ka shumë punë. Por kemi vullnet të madh, energji dhe një vizion të qartë: Obiliq me zhvillim ekonomik, me ajër më të pastër, me investime në arsim, me infrastrukturë dhe me shëndetësi moderne.Sot nuk po premtoj mrekulli. Po premtoj punë. Po premtoj drejtësi. Po premtoj integritet.Po premtoj se në këtë komunë askush nuk do të jetë i paprekshëm.Të paprekshëm do të jenë vetëm ligji dhe interesat e qytetarëve.Dhe tani, me besim, me mirënjohje dhe përkushtim, e nis këtë rrugë.Ju falënderoj për çdo votë, për çdo ditë pune dhe për çdo kritikë që do të na ndihmojë të jemi më të mirë.Zoti e bekoftë Kosovën.Zoti e bekoftë Obiliqin.Faleminderit.”Zyra për Informim, Obiliq.
