Komuna e Obiliqit po forcon bashkëpunimin ndërkombëtar dhe po hap rrugë të reja për projekte konkrete dhe investime në të mirë të qytetarëve.
Në kuadër të vizitës zyrtare në Pernik të Bullgarisë, delegacioni i Komunës së Obiliqit, i kryesuar nga Nënkryetari i Komunës, z. Berat Gashi, së bashku me Drejtorin për Urbanizëm, Kadastër dhe Pronë, z. Gazmend Krasniqi, Drejtorin për Financa dhe Zhvillim Ekonomik, z. Besnik Krasniqi, dhe Koordinatorin për Projekte dhe Ngritje të Fondeve, z. Behar Gashi, zhvilloi takime të rëndësishme institucionale me Nënkryetarët e Komunës së Pernikut, z. Stefan Krastev dhe z. Adrian Skrimov.
Në fokus të takimeve ishte ndërtimi i një partneriteti të qëndrueshëm ndërmjet dy komunave, me synim që bashkëpunimi të përkthehet në iniciativa dhe projekte konkrete.
Gjatë takimeve u diskutua për:
- Përgatitjen dhe zhvillimin e projekteve të përbashkëta
- Aplikimet e përbashkëta në fondet dhe programet e Bashkimit Evropian
- Shkëmbimin e përvojave në zhvillimin ekonomik dhe menaxhimin komunal
- Bashkëpunimin në fushën e rinisë, kulturës dhe trashëgimisë
- Krijimin e mundësive të reja për qytetarët dhe komunitetet e të dyja komunave
Në kuadër të programit, delegacioni vizitoi Drejtorinë e Minierave dhe Mineraleve, Pallatin e Kulturës, Muzeun e Minierave dhe Mineraleve dhe Muzeun Arkeologjik, duke u njohur nga afër me përvojën e Pernikut në menaxhimin e trashëgimisë industriale, kulturore dhe historike.
Gjithashtu, delegacioni vizitoi Qendrën Ndërkombëtare për Rini dhe mori pjesë në festivalin rinor “Peyka”, me qëllim të shkëmbimit të përvojave dhe krijimit të mundësive për bashkëpunim të mëtejshëm në fushën e rinisë dhe kulturës.
Komuna e Obiliqit po e orienton bashkëpunimin ndërkombëtar drejt rezultateve konkrete: partneriteteve të reja, projekteve të përbashkëta dhe mobilizimit të fondeve për zhvillimin e komunës.
Obiliqi dhe Perniku janë dy komuna me histori dhe sfida të ngjashme, por me potencial të madh për të ndërtuar së bashku një të ardhme më të zhvilluar dhe më të qëndrueshme.
