U inaugurua Korridori i Gjelbër në Obiliq, një ndërhyrje e vogël në përmasë, por me ndikim të madh, e vendosur në një zonë shumë strategjike pranë termocentralit Kosova B, ku ndotja e ajrit ndjehet çdo ditë nga komunitetet përreth.
Inaugurimi u mbajt në prani të Kryetarit të Komunës së Obiliqit, z. Halil Thaçi, si dhe të z. Dudley Tarlton, Përfaqësues i Përhershëm i UNDP-së në Kosovë, duke shënuar fillimin e një partneriteti të fuqishëm me synim ndërtimin e një qyteti më të gjelbër dhe më të shëndetshëm.
Kjo ndërhyrje kombinon zgjidhje të bazuara në natyrë me teknologji të gjelbra, si sistemi i ujitjes së mençur, duke demonstruar se si veprimet e integruara mund të adresojnë sfida komplekse mjedisore dhe të kontribuojnë në përmirësimin e cilësisë së jetës urbane.
Një moment i veçantë ishte përfshirja e nxënësve të Gjimnazit “17 Shkurti” gjatë mbjelljes së pemëve, ku secili nxënës u caktua si kujdestar i një peme të mbjellë në emrin e tij/saj; një simbol i përkujdesjes afatgjatë, përgjegjësisë mjedisore dhe pronësisë lokale.
“Është shumë domethënëse që pemët po mbillen pikërisht këtu. Ne, të rinjtë e Obiliqit, e përjetojmë ndotjen çdo ditë, që e gjithë Kosova të ketë energji elektrike,” – Ermal Ismajli, nxënës i Gjimnazit “17 Shkurti”.
Zbatuar nga projekti i UNDP-së Fondi për Eksperimentim Urban dhe mbështetur nga Ministria e Financave e Republikës së Sllovakisë.
