Kryetari i Komunës së Obiliqit, z. Xhafer Gashi, me nder dhe krenari të veçantë, mori pjesë si anëtar i delegacionit shtetëror të Republikës së Kosovës, të udhëhequr nga Presidentja e vendit, znj. Vjosa Osmani, në vizitën e parë zyrtare dhe historike të këtij niveli në Zvicër.
Kjo vizitë filloi në rezidencën zyrtare të Këshillit Federal të Zvicrës, ku delegacioni i Kosovës u mirëprit me nderime të larta nga Presidentja e Konfederatës, znj. Karin Keller-Sutter, dhe anëtarët e Këshillit Federal.
Ceremonia solemne në Sheshin Federal në Bernë, takimet e frytshme me udhëheqësit e lartë të shtetit zviceran dhe me bashkatdhetarët tanë të dashur që jetojnë e veprojnë në Zvicër, ishin dëshmi e qartë e marrëdhënieve të shkëlqyera dhe miqësisë së thellë mes dy shteteve tona, duke theksuar se populli dhe institucionet e vendit tonë janë thellësisht mirënjohës për mbështetjen konkrete që Zvicra ka ofruar ndër vite si në skenën ndërkombëtare, ashtu edhe për qytetarët tanë në vend dhe në mërgatë.
Për Kryetarin Gashi, kjo vizitë kishte edhe një domethënie të veçantë personale, pasi Zvicra për afro një dekadë ishte shtëpia e tij e dytë.
Kryetari Gashi shprehu falënderimet e tij të përzemërta për mikpritjen dhe respektin e treguar nga autoritetet zvicerane, duke vlerësuar lart rolin e Zvicrës si një partnere e rëndësishme dhe përkrahëse e vazhdueshme e Republikës së Kosovës.
